يلة القبض عليا!!!!! جزء اول
الو..
مين معايا؟
انا العقيد كذا مباحث امن الدولة وكنا عاوزين نتكلم معاك شوية, على فكرة اخوك رضا معانا وهيمشي دلوقت
طب تحب اجيلك امتى؟
انت في السويس دلوقت؟ خلاص هنستناك الساعة 9 مساء واخوك هيقولك تجيلنا فين
خلاص اتفقنا
سلام....
دي كانت مكالمة من ضابط امن دولة فرع مدينة نصر ليا, وفي الحقيقة انا قعدت اغكر هما عاوزني ليه, مكانش فيه غير اجابة واحدة.. اكيد عشان موضوع افغانستان
سافرت الى القاهرة في اواخر اغسطس 2002 ورحت الى اخويا في الحي السابع وقاللي على حصل انهم جم الى البيت وخدوه على امن الدولة وسئلوه عن سفري الى افغانستان وقالهم الموضوع ده قديم لانه كان في نهاية التمانينات
رحت انا واخويا الى فرع مدينة نصروقعدت اكتر من ساعة في انتظار الضابط هشام, امين مباحث ندالي وقال لاخويا امشي انت دلوقت , خدني من الاستراحة الى ممر رملي وهناك ربط عيني بغمامة ودخلت مكتب تقريبا ورحب بيا الضابط وقعد يسالني عن موضوع سفري الى افغانستان وقلت ده كان من زمان ايام لما كنت طالب في الجامعة وحماس الشباب وفضل يسالني عن اشياء ةكنت مش عارف اجاوب بصدق ولا اكذب لغاية لما عرفت انه عارف تقريبا كل حاجة لما سئلني عن كنيتي_ وهو اسم الشهرة او الحركي وقلت ابو عبد الله , فرد قائلا امال بن ابي قحافة يبقى مين؟؟ وهنا قلت في نفسي لم الدور يلا ده عرف كنيتي يبقى اجي معاه دوغري وقلت اصل كان لي كنية وانا في جدة ولما سافرت الى باكستان غيرته.
وسالني عن معرفتي ببن لادن والظواهري وعن مراكز التدريب وعن السلاح , لغاية لما قالي يعني لو رحنا فتشنا في بيت العيلة مش هنلاقي حاجة فقلت طبعا لأه.
يتبع.......
ليست هناك تعليقات:
إرسال تعليق